Energetika yangiliklari

2020-yil “Ilm-ma’rifat va raqamli iqtisodiyotni rivojlantirish yili” deb e’lon qilinganligi munosabati bilan, axborot texnologiyalari sohasida kuchli kadrlar tayyorlash va ushbu sohani O‘zbekiston Respublikasi aholisi orasida ommalashtirish imkonini beradigan ko‘plab loyihalar faol tashkil etilmoqda.
Belgilangan vazifalarni bajarish va aholining keng qatlamlariga axborot texnologiyalari sohasida O‘zbekiston Respublikasi Axborot texnologiyalari va kommunikasiyalarini rivojlantirish vazirligi, IT Park va IT Akademiyasi tomonidan “Dubay Future Foundation” bilan hamkorlikda talab yuqori bo‘lgan ko‘nikmalarni bepul o‘rganish imkoniyatini yaratish maqsadida “Udacity” kurslari asosida “Bir million dasturchi” loyihasi amalga oshirilmoqda.
“One Million Uzbek Coders” tashabbusi mahalliy IT ta’limini rivojlantirishga yo‘naltirilgan bo‘lib, shu bilan O‘zbekiston aholisiga nafaqat ingliz tilida, balki o‘zbek tilida ham IT mutaxassisliklari uchun qulay va sifatli o‘qitish imkonini beradi. Loyihaning maqsadi IT mutaxassislari avlodini rivojlantirish, ularni axborot texnologiyalari sohasida kelgusida professional ish olib borishi uchun zarur barcha vositalar bilan jihozlashdan iborat.

“One Million Uzbek Coders” – (OMUC) loyihasi 4 ta yo‘nalishni o‘z ichiga oladi:

• Android (Google bilan hamkorlikda);
• Front-end development;
• Full-stack development;
• Ma’lumotlarni tahlil qilish.

Har bir trek asosiy 120 soatlik yoki 12 haftalik kursdan boshlanadi.

Ayni paytda uzbekcoders.uz portalida 69 003 dan ortiq talabalar ro‘yxatga olingan, shundan 5 810 tasi ikkinchi bosqichdan o‘tdi va kurslarni muvaffaqiyatli yakunlaganligi uchun maxsus sertifikat bilan taqdirlandi.

Ahamiyatli tomoni shundaki, “Buxoro hududiy elektr tarmoqlari korxonasi” AJ Axborot texnologiyalari bo‘limida ishlovchi barcha xodimlar uzbekcoders.uz portalida ro‘yxatdan o‘tib, “Front-end development” kursining “Qatnashuvchi” va “Bitiruvchi” bosqichlarini muvaffaqiyatli yakunlab, o‘z bilim va ko‘nikmalarini oshirish bilan bir qatorda tegishli sertifikatlarga ham ega bo‘ldilar.

“Buxoro HETK” AJ matbuot xizmati

O‘zbekiston Respublikasi Prezidenti Shavkat Mirziyoev “Hududiy elektr tarmoqlari” aksiyadorlik jamiyatining Elektr energiyasini hisobga olishni avtomatlashtirish markazi faoliyati bilan yaqindan tanishdi.

Bo‘lib o‘tgan taqdimotda amalga oshirilgan ishlar va erishilgan natijalar Buxoro viloyati misolida ko‘rsatib berildi.

Elektr energiyasini hisobga olishni avtomatlashtirilgan tizimi loyihasini amalga oshirish, O‘zbekiston Respublikasi Prezidentining 2018 yil 23 oktyabrdagi “Elektr energetikasi tarmog‘ini jadal rivojlantirish va moliyaviy barqarorligini ta’minlash chora-tadbirlari to‘g‘risida”gi qaroriga asosan Buxoro, Samarqand, Jizzax viloyatlarida elektr energiyasini hisobga olishni avtomatlashtirish tizimiga mos bo‘lgan hisoblagichlarni o‘rnatish ishlari 2019 yilda boshlandi. Viloyat bo‘yicha 437046 hisoblagichdan 430116 tasi (98%) almashtirildi. Shundan 425615 tasi (99%) billing tizimiga ulandi. Aholi iste’molchilariga 2019 yilda yetkazib berilgan elektr energiya 656.3 mln. Kvt.soat bo‘lgan bo‘lsa 2020 yilda 743.9 mln. Kvt.soat ya’ni 87.6 mln. Kvt.soat ortiqcha elektr energiya yetkazib berildi.

“Buxoro hududiy elektr tarmoqlari korxonasi” aksiyadorlik jamiyati ma’muriy binosi va tuman, shahar elektr ta’minoti korxonalarida kichik “data-sentr” tashkil qilingan bo‘lib, elektr energiyasini hisobga olishni avtomatlashtirish tizimiga ulangan barcha aqlli hisoblagichlardan doimiy ravishda ma’lumotlarni qabul qilib markazlashgan ma’lumotlar markazi (data sentr)ga yetkazib beradi. Buning natijasida elektr energiyasi iste’moli hisob-kitoblari soat, kun, oylik va yillik energiya balanslari to‘g‘ri shakllanmoqda.

Ushbu tizim orqali barcha elektr uzatish tarmoqlari, transformator punkt yuklamalarini tongi va kechki tig‘iz vaqtlarda me’yorda ushlab turish, avariyali o‘chishlarni qisqa vaqt ichida aniqlash va bartaraf etish, elektr hisoblagich elektr energiyasini qabul qilish va uzatishda ma’lumotlar almashinuvida ikki tomonlama imkoniyat yaratilishi, yuklama ostida ishlayotgan transformator punktlarini ushbu tizim yordamida aniqlab, kelajakda modernizasiya va rekonstruksiya qilish ishlarini rejalashtirish imkoniyati mavjud.

Pirovard natijada elektr hisoblagichlar billing tizimga ulanib, qarzdor iste’molchilar avtomatik tarzda tarmoqdan uziladi va elektr energiyasi haqi to‘langanidan keyin avtomatik tarzda qayta tarmoqqa ulanadi.

Bunda inson omili kamayib, noqonuniy ulanishlar va korrupsiya holatlariga chek qo‘yiladi.

«Buxoro HETK» AJ matbuot xizmati

“Buxoro hududiy elektr tarmoqlari korxonasi”AJning katta majlislar zalida “Hududiy elektr tarmoqlari” AJ Davlat va shartnomaviy xizmatlarni rivojlantirish boshqarma boshlig‘i N.Meyliyev va boshqarma mutaxassisi M.Abdullayev, “Buxoro HETK” AJning rahbariyati, tegishli xizmat xodimlari hamda jamiyat tasarrufidagi barcha shahar va tuman rahbarlari, bosh muhandislari, mas’ul xizmat xodimlari ishtirokida o‘quv seminar tashkil etildi.

Seminarda yuridik va jismoniy shaxslarga davlat va shartnomaviy xizmatlar ko‘rsatishni rivojlantirish, iste’molchilardan kelib tushayotgan murojaatni to‘la qamrab olish choralarini ko‘rish, xizmat ko‘rsatishning natijadorligini oshirishda yo‘l qo‘yilayotgan kamchiliklarga alohida e’tibor qaratildi va kamchiliklarni bartaraf etishda nimalarga ahamiyat berish kerakligi haqida prezentasiya ko‘rinishida batafsil tushunchalar berildi.

Shu jumladan davlat va shartnomaviy xizmatlarini ko‘rsatishda “korrupsiya”ga aslo yo‘l qo‘ymaslik, xizmatlarni ko‘rsatishda shaffoflikni ta’minlash, korrupsiyaning salbiy oqibatlari haqida misollar bilan batafsil tushunchalar berildi.

Jamiyat rahbari B.Xayotov tomonidan bugungi kundagi davlat va shartnomaviy xizmatlarni ko‘rsatishdagi natijalar yaxshi emasligi tanqid qilinib, rivojlantirish istiqbollari yuzasidan korxona mas’ullariga alohida ko‘rsatma va topshiriqlar berildi.

Shuningdek, davlat va shartnomaviy xizmatlarni ko‘rsatishdan korxonaga kelib tushadigan mablag‘lar shu korxonada faoliyat olib borayotgan har bir xodimning mehnat sharoitlari yaxshilanishi, moddiy texnika bazasining mustahkamlanishi, xodimlarni qo‘shimcha moliyaviy rag‘batlantirilishiga hamda korxonaning ravnaq topishi uchun qo‘shimcha loyihalarni tadbiq qilinishiga sarflanishi ta`kidlandi.

Seminar savol javob tarzida amalga oshirilib, xodimlarni qiziqtirgan barcha savollarga mutasaddilar tomonidan atroflicha javoblar qaytarildi va bildirilgan takliflar tinglandi.

“Buxoro HETK” AJ matbuot xizmati