Tadbirlar

Mamlakatimizda raqamli iqtisodiyotni jadal rivojlantirish, barcha tarmoq va sohalarda zamonaviy axborot-kommunikatsiya texnologiyalarini keng joriy etish bo‘yicha kompleks chora-tadbirlar amalga oshirilmoqda.

Xususan, O‘zbekiston Respublikasi Prezidenti rahbarligida 2020-yil 11-may kuni “Raqamli iqtisodiyot” va “Elektron hukumat”ni rivojlantirishning ustuvor vazifalari to‘g‘risida o‘tkazilgan yig‘ilishda berilgan topshiriq va ko‘rsatmalar hamda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasida belgilangan vazifalar ijrosini ta’minlash maqsadida “Raqamli O‘zbekiston – 2030” strategiyasi ishlab chiqilgan.

Mazkur strategiya doirasida “Buxoro hududiy elektr tarmoqlari korxonasi” AJning Axborot texnologiyalari xodimlari Respublika IT-Park qoshidagi IT-CENTER tomonidan zamonaviy texnologiyalardan foydalangan holda, yuqori malakali mutaxassislar tomonidan va karantin qoidalariga rioya qilingan holda onlayn tarzda “Davlat va xo’jalik boshqaruvi, mahalliy davlat hokimiyati organlari, tashkilotlar va idoralarning axborot-kommunikatsiya texnologiyalarini joriy etishga mas’ul bo’lgan rahbar mutaxassislari uchun” umumiy jami 36 soatlik malaka oshirish kursini muvaffaqiyatli yakunlab, sertifikatlarni qo‘lga kiritishdi.

Bugungi kunda “Buxoro HETK” АJ tomonidan jamiyatda faoliyat yuritib kelayotgan har bir xodimga munosib mehnat sharoitlarini yaratib berish ustuvor vazifalardan biri etib belgilangan. Darhaqiqat, soʼnggi yillarda boʼlim va xizmatgohlar xonalarini toʼla taʼmirlab, zamonaviy mebellar toʼplami bilan jihozlash hamda shahar va tuman elektr taʼminoti korxonalarining maʼmuriy binolarida birma-bir mukammal taʼmirlash ishlari bajarilmoqda va xodimlarning zamonaviy, shinam xonalarda mehnat qilishlari uchun keng imkoniyatlar yaratilmoqda.

Xuddi shunday yangilanishlardan yana biri Loyihalash guruhi uchun ham amalga oshirilib, guruh uchun ajratilgan xona toʼla taʼmirdan chiqarildi. Ushbu xona guruh faoliyati uchun kerakli, yuqori modifikatsiyadagi kompyuter va printer qurilmalari hamda zamonaviy mebellar toʼplami bilan jihozlangan. Shuningdek, kompyuterlarda kerakli dasturiy komplekslar oʼrnatilgan boʼlib, ular internet tarmogʼiga ulangan.

“Biz yaratib berilgan imkoniyat va qulayliklardan xursandmiz, bu bizning kuchimizga kuch, gʼayratimizga gʼayrat qoʼshadi” –deydi guruh rahbari, uzoq yillar davomida sohada xizmat qilib kelayotgan, koʼplab yetuk mutaxassis xodimlar yetishib chiqishida oʼz hissasini qoʼshgan, ustozimiz Rahmon Rayimov.

Аlbatta bu kabi mehnat sharoitlari xodimlarda mamnunlik hissini uygʼotishi bilan birgalikda, oʼz zimmalaridagi vazifalarni masʼuliyat bilan ado etishga undaydi va mehnat samaradorligining oshishiga xizmat qiladi.

“Buxoro HETK” АJ matbuot xizmati

2020-yil “Ilm-ma’rifat va raqamli iqtisodiyotni rivojlantirish yili” deb e’lon qilinganligi munosabati bilan, axborot texnologiyalari sohasida kuchli kadrlar tayyorlash va ushbu sohani O‘zbekiston Respublikasi aholisi orasida ommalashtirish imkonini beradigan ko‘plab loyihalar faol tashkil etilmoqda.
Belgilangan vazifalarni bajarish va aholining keng qatlamlariga axborot texnologiyalari sohasida O‘zbekiston Respublikasi Axborot texnologiyalari va kommunikasiyalarini rivojlantirish vazirligi, IT Park va IT Akademiyasi tomonidan “Dubay Future Foundation” bilan hamkorlikda talab yuqori bo‘lgan ko‘nikmalarni bepul o‘rganish imkoniyatini yaratish maqsadida “Udacity” kurslari asosida “Bir million dasturchi” loyihasi amalga oshirilmoqda.
“One Million Uzbek Coders” tashabbusi mahalliy IT ta’limini rivojlantirishga yo‘naltirilgan bo‘lib, shu bilan O‘zbekiston aholisiga nafaqat ingliz tilida, balki o‘zbek tilida ham IT mutaxassisliklari uchun qulay va sifatli o‘qitish imkonini beradi. Loyihaning maqsadi IT mutaxassislari avlodini rivojlantirish, ularni axborot texnologiyalari sohasida kelgusida professional ish olib borishi uchun zarur barcha vositalar bilan jihozlashdan iborat.

“One Million Uzbek Coders” – (OMUC) loyihasi 4 ta yo‘nalishni o‘z ichiga oladi:

• Android (Google bilan hamkorlikda);
• Front-end development;
• Full-stack development;
• Ma’lumotlarni tahlil qilish.

Har bir trek asosiy 120 soatlik yoki 12 haftalik kursdan boshlanadi.

Ayni paytda uzbekcoders.uz portalida 69 003 dan ortiq talabalar ro‘yxatga olingan, shundan 5 810 tasi ikkinchi bosqichdan o‘tdi va kurslarni muvaffaqiyatli yakunlaganligi uchun maxsus sertifikat bilan taqdirlandi.

Ahamiyatli tomoni shundaki, “Buxoro hududiy elektr tarmoqlari korxonasi” AJ Axborot texnologiyalari bo‘limida ishlovchi barcha xodimlar uzbekcoders.uz portalida ro‘yxatdan o‘tib, “Front-end development” kursining “Qatnashuvchi” va “Bitiruvchi” bosqichlarini muvaffaqiyatli yakunlab, o‘z bilim va ko‘nikmalarini oshirish bilan bir qatorda tegishli sertifikatlarga ham ega bo‘ldilar.

“Buxoro HETK” AJ matbuot xizmati

O‘zbekiston Respublikasi Prezidenti Shavkat Mirziyoev “Hududiy elektr tarmoqlari” aksiyadorlik jamiyatining Elektr energiyasini hisobga olishni avtomatlashtirish markazi faoliyati bilan yaqindan tanishdi.

Bo‘lib o‘tgan taqdimotda amalga oshirilgan ishlar va erishilgan natijalar Buxoro viloyati misolida ko‘rsatib berildi.

Elektr energiyasini hisobga olishni avtomatlashtirilgan tizimi loyihasini amalga oshirish, O‘zbekiston Respublikasi Prezidentining 2018 yil 23 oktyabrdagi “Elektr energetikasi tarmog‘ini jadal rivojlantirish va moliyaviy barqarorligini ta’minlash chora-tadbirlari to‘g‘risida”gi qaroriga asosan Buxoro, Samarqand, Jizzax viloyatlarida elektr energiyasini hisobga olishni avtomatlashtirish tizimiga mos bo‘lgan hisoblagichlarni o‘rnatish ishlari 2019 yilda boshlandi. Viloyat bo‘yicha 437046 hisoblagichdan 430116 tasi (98%) almashtirildi. Shundan 425615 tasi (99%) billing tizimiga ulandi. Aholi iste’molchilariga 2019 yilda yetkazib berilgan elektr energiya 656.3 mln. Kvt.soat bo‘lgan bo‘lsa 2020 yilda 743.9 mln. Kvt.soat ya’ni 87.6 mln. Kvt.soat ortiqcha elektr energiya yetkazib berildi.

“Buxoro hududiy elektr tarmoqlari korxonasi” aksiyadorlik jamiyati ma’muriy binosi va tuman, shahar elektr ta’minoti korxonalarida kichik “data-sentr” tashkil qilingan bo‘lib, elektr energiyasini hisobga olishni avtomatlashtirish tizimiga ulangan barcha aqlli hisoblagichlardan doimiy ravishda ma’lumotlarni qabul qilib markazlashgan ma’lumotlar markazi (data sentr)ga yetkazib beradi. Buning natijasida elektr energiyasi iste’moli hisob-kitoblari soat, kun, oylik va yillik energiya balanslari to‘g‘ri shakllanmoqda.

Ushbu tizim orqali barcha elektr uzatish tarmoqlari, transformator punkt yuklamalarini tongi va kechki tig‘iz vaqtlarda me’yorda ushlab turish, avariyali o‘chishlarni qisqa vaqt ichida aniqlash va bartaraf etish, elektr hisoblagich elektr energiyasini qabul qilish va uzatishda ma’lumotlar almashinuvida ikki tomonlama imkoniyat yaratilishi, yuklama ostida ishlayotgan transformator punktlarini ushbu tizim yordamida aniqlab, kelajakda modernizasiya va rekonstruksiya qilish ishlarini rejalashtirish imkoniyati mavjud.

Pirovard natijada elektr hisoblagichlar billing tizimga ulanib, qarzdor iste’molchilar avtomatik tarzda tarmoqdan uziladi va elektr energiyasi haqi to‘langanidan keyin avtomatik tarzda qayta tarmoqqa ulanadi.

Bunda inson omili kamayib, noqonuniy ulanishlar va korrupsiya holatlariga chek qo‘yiladi.

“Buxoro HETK” AJ matbuot xizmati