Ortiqchasini o’chirsangiz, kimnidir chirog’ini yoqqan bo’lasiz

   Ishdan kelsam, odam borida ham, yo‘g‘ida ham – hamma xonada chiroq yoniq. Ikkita televizor ham. Qolganlarini aytmay qo‘ya qolay. Xullas, hech kimga nafi tegmayotganlarini o‘chirdim. Uyda faqat nabiralarim bor edi. Ularga qattiq dakki bermadim.Chunki ular hali bola. Yotig‘i bilan tushuntirdim. Elektrni behuda sarflash ham uvollar sirasidan ekanligini aytdim. Va atigi bitta chiroqni yoqish yoki o‘chirish elektr tarmog‘i tugul elektr korxonasida ham shu zahoti sezilishi haqida quyidagi eshitganim va ko‘rganimni aytib berdim.

… Xizmat yuzasidan bir necha bor Markaziy Osiyodagi gigant korxona – Sirdaryo issiqlik elektr stansiyasi ichida bo‘lganman. Ulkan, qudratli generatorlarning baland shovqinli ish maromini kuzatganman. Haqiqatan har jihatdan mahobatli, u.

Ishlab chiqarilayotgan elektr energiyasi miqdori boshqaruv pultidagi monitorlarda muntazam aks etib, qizig‘i, raqamlar dam-badam o‘zgarib ham turadi. Bunga qiziqib so‘rasam, raqamlarning tez-tez o‘zgarishi iste’molchilar tomonidan o‘chirish-yoqishlarning umumiy ko‘rinishi ekan. Ya’ni iste’mol ko‘paysa, raqam yiriklashadi, kamayganda esa aksincha, albatta.

Bir chelakni to‘ldirib olsangiz, daryo suvi kamayib qolmaydi guyo. Aslida esa unday emas. Lekin bir vaqtning o‘zida millionlab, milliardlab paqirda suv olinsa, qanchalar to‘lib-toshmasin, har qanday daryo ham darhol sayozlanishi aniq. Shu ma’noda millionlab, milliardlab chiroqlarning bir vaqtda, behuda yonib turishi ham, ta’bir joiz bo‘lsa, elektr daryosini sayozlantirib qo‘yadi. Agar har birimiz faqat kerakli elektr vositalarinigina tokka ulab, qolganlarini bekorga yoqib qo‘ymasak, eh-he, shuning o‘zidan o‘zimizga ham, boshqalarga ham qanchadan-qancha foyda keltiramiz.

Alqissa: bitta bo‘lsa-da zaruratsiz yonib turgan chiroq yo boshqa elektr jihozini o‘chirsak, qaysidir yurtdoshimizning xonadoniga yorug‘lik ulashamiz, uning o‘chiq chirog‘i yonadi. Va bu bilan ham uvolga yo‘l qo‘ymaymiz, ham kimgadir naf keltirishdek savobga ega bo‘lamiz.

Omon bo‘lingizlar, azizlar! Har birimizning uyimiz ham, ko‘nglimiz ham charog‘on bo‘lsin, ilohim.

Ahmadali Shernazarov, “Xalq soʻzi” gazetasining Sirdaryo viloyati boʻyicha muxbiri

>>

Sovuq kunlarda aholi xonadonlari qarzdorlik sabab tarmoqdan uzilmaydi.

“Hududiy elektr tarmoqlari” AJ tomonidan sovuq kunlari iste’molchilarga qulaylik yaratish maqsadida aholi xonadonlari uchun qarzdorlik sabab elektr ta’minotidan uzilmasligini ma’lum qilamiz.

Ayni kun holatiga qarzdor iste’molchilar tarmoqdan uzilmaydi.

“Hududiy elektr tarmoqlari” AJ Matbuot xizmati

>>

ELEKTR ENERGIYASI ISTE’MOLCHILARI DIQQATIGA!

Tizimda quvvat tanqisligi kuzatilgan vaqtlarda 2023 yil 11-20 yanvar kunlari yuqorida keltirilgan jadval asosida hududlarga cheklovlar kiritilishi mumkinligini bildiramiz.

“Buxoro hududiy elektr tarmoqlari korxonasi” AJ

Batafsil 👉👉👉@buxenergo

>>

Energetika vazirligining murojaati: Qishdan chiqib olish uchun hammamiz birgalikda energiyani iqtisod qilaylik.

“Xatolarimiz sababli sovuqqotyapmiz. Ammo hozir, shu lahzada, bir musht bo‘lib, jamiyat bo‘lib qish sovug‘idan o‘tib olmasak bo‘lmaydi. Bu bizning qo‘limizdan keladi. Har birimiz energiyani iqtisod qilishga urinsak, talafotlarni kamaytirishimiz mumkin bo‘ladi”.

2016 yildan buyog‘iga aholi va iqtisodiyotni energiya bilan ta’minlash sohasida ko‘plab ishlar qilindi, raqamlar bunga dalil. Ko‘rilgan mazkur chora-tadbirlar yetarli bo‘lmagani bu yilgi qishga kelib aniq bo‘lib qoldi: elektr energiyasini yetarlicha ishlab chiqarish uchun kerak bo‘lgan yoqilg‘i – tabiiy gaz yetmayapti. Aniqrog‘i, tabiiy gaz zaxirasini yaratish uchun kerakli ishlar qilinmagan.

Mazkur favqulodda vaziyatda favqulodda ishlarni qilish lozimligi ayon bo‘lyapti. Sovuq qishdan imkoni boricha talafotlarsiz o‘tib olish uchun. Va bu yerda mashhur haqiqat gavdalanyapti – favqulodda holatlar kimlarningdir xatosi bilan yuzaga keladi, ammo ulardan chiqib ketish uchun butun xalqning harakati, jonbozligi kerak bo‘ladi.

Shu topdagi holatimiz ham ayni shunday vaziyat – energiyani hamma, jamiyat o‘laroq, bir musht bo‘lib iqtisod qilmasak, qishdan omon o‘tib olishimiz qiyin bo‘ladi.

O‘zbekiston Respublikasi Energetika vazirligi buyurtmasi bilan yaratilgan animatsion murojaatni e’tiboringizga havola qilamiz.

▶️ANIMATSION MUROJAATNI KO’RISH

👉 https://kun.uz/uz/03380455

▶️@minenergy_uz

>>

Kutilayotgan anomal sovuq kunlari energotizimda amalga oshirilishi lozim bo‘lgan chora-tadbirlar belgilab olindi.

 Joriy yilning 4-yanvar kuni Energetika vaziri boshchiligida tizim korxonalari rahbarlari va mas’ul xodimlari ishtirokida videoselektor yig‘ilishi bo‘lib o‘tdi. Unda kelgusi hafta respublikamiz hududida havo haroratining anomal pasayishi davrida yoqilg‘i-energetika sohasidagi ishlarni to‘g‘ri va tizimli tashkil qilish, iste’molchilarni energiya resurslari bilan barqaror ta’minlash bo‘yicha zarur choralar ko‘rish masalalari muhokama qilindi va qator vazifalar belgilab berildi.

Jumladan, birinchi navbatda aholi va ijtimoiy soha obyektlariga elektr energiyasi, tabiiy va suyultirilgan gaz hamda ko‘mir mahsulotini barqaror yetkazib berish choralari ko‘rilishi ta’kidlandi. Buning uchun:

1. Avtomobillarga gaz to‘ldirish kompressor shoxobchalari faoliyatiga kiritilayotgan cheklovlar davom ettiriladi;

2. Yirik ishlab chiqarish korxonalariga tabiiy gaz yetkazib berish hajmi keskin kamaytiriladi;

3. Energotizimdagi yirik iste’molchilarning kunlik elektr energiyasi iste’moli kamaytiriladi va tejalgan 11-12 mln kVt-soat elektr energiyasi aholi iste’moliga yo‘naltiriladi;

4. Energotizimda sodir bo‘lishi mumkin bo‘lgan yirik avariyalarni oldini olish, barcha iste’molchilarni bir maromda elektr energiyasi bilan ta’minlash maqsadida mahalliy hokimliklar bilan kelishilgan holda tasdiqlangan grafiklarga asosan qisqa muddatli cheklovlar kiritiladi;

5. Elektr energiyasini ishlab chiqaruvchi issiqlik elektr stansiyalari va markazlarning barqaror ishlashini ta’minlash maqsadida kuniga o‘rtacha 49 mln kub metr tabiiy gaz yetkazib beriladi;

6. Bugungi kunda mazkur stansiyalar uchun 90 ming tonna mazut va 280 ming tonna ko‘mir yoqilg‘isi zaxirasi yaratildi;

7. Iste’molchilarga kunlik ko‘mir yetkazib berish hajmi 5000 tonnadan 8000 tonnaga oshiriladi.

Yig‘ilishda sovuq kunlarda elektr energiyasiga bo‘lgan talab ortishi natijasida elektr tarmoqlari va transformator punktlarida ham yuklamalar keskin oshishi ta’kidlandi.

Bunda, dispetcherlar mahalliy hokimliklar va hududiy elektr tarmoqlari korxonalari tomonidan tasdiqlangan cheklov grafiklariga qat’iy amal qilishlari, ya’ni belgilangan muddatdan ortiq cheklovlar kiritmasligi ta’kidlandi.

Ikki soatdan oshmagan vaqt oralig‘ida hududlar kesimida joriy etilayotgan cheklov grafiklari barcha viloyat hududiy elektr tarmoqlari korxonalarining ijtimoiy tarmoqdagi sahifalarida e’lon qilib borilishi ta’minlanadi.

Shuningdek, anomal sovuq kunlarida tarmoqlarda yuzaga kelishi mumkin bo‘lgan nosozliklarni bartaraf etish uchun elektr va gaz ta’minoti korxonalarida tunu-kun ishlaydigan 1000 dan ortiq maxsus brigada tashkil etildi. Ushbu brigadalar muammolarni tezkorlik bilan bartaraf etilishini ta’minlaydilar.

Iste’molchilar elektr energiyasi ta’minoti yuzasidan 1154 qisqa raqami yoki “Telegram”dagi @HET_admin administratorga, tabiiy va suyultirilgan gaz ta’minoti yuzasidan 1104, 104 telefon raqamlari yoki Facebook ijtimoiy tarmoqdagi guruhga hamda ko‘mir ta’minoti yuzasidan 78-148-30-03, 71-244-38-28 telefon raqamlari va @Uzbekcoaluz_bot “Telegram” botga murojaat qilishlari mumkin.

Shu o‘rinda iste’molchilardan elektr qurilmalari va isitish moslamalariga nihoyatda ehtiyotkorlik bilan munosabatda bo‘lishlarini, ushbu qurilmalardan foydalanilmayotgan vaqtlarda tarmoqdan ajratib qo‘yishlarini, energiya resurslaridan imkon qadar tejamkorlik bilan foydalanishlarini, shuningdek, is gazidan zaharlanishning oldini olish yuzasidan berilayotgan tavsiyalarga qat’iy rioya qilishlarini so‘raymiz.

O‘zbekiston Respublikasi Energetika vazirligi Matbuot xizmati

▶️@minenergy_uz

>>